Avakashi (1954)

ഞാന്‍ ക്രിസ്തുമസ്സായതുകൊണ്ട് വീട്ടില്‍ കഴിയുകയാണ്. പെട്ടെന്ന് മെരിലാന്‍ഡില്‍ നിന്നും ഒരു കമ്പി. “ഡിസംബര്‍ ഇരുപത്തിരണ്ടാം തീയതി തിരുവനന്തപുരത്തെത്തണം”.

“ക്രിസ്തുമസ് കഴിഞ്ഞിട്ടു വന്നാല്‍ പോരേ” എന്ന് ഞാനന്വേഷിച്ചു. പോരാ, ഇരുപത്തിരണ്ടാം തീയതി തന്നെ ചെല്ലണമെന്നായിരുന്നു മറുപടി. ‘അവകാശി’ ചിത്രത്തിലാക്കുവാന്‍ പെട്ടെന്നെടുത്ത തീരുമാനമായിരുന്നു അതിനു കാരണം. ‘അവകാശി’യുടെ ജനനവും അത്ര ധൃതിയിലായിരുന്നു. പത്മിനിയെ പ്രധാന നായികയായും എന്നെ രണ്ടാം നായികയായുമുള്ള ഒരു ചിത്രത്തിനുവേണ്ട ഒരുക്കങ്ങള്‍ നടന്നുകൊണ്ടിരുന്നതാണ്. ആ ചിത്രത്തിന്‍റെ കാലതാമസം കണ്ടിട്ട് ആ പരിപാടി ഉപേക്ഷിക്കുകയും മുക്കാല്‍ മണിക്കൂര്‍കൊണ്ട് മുതലാളി ഒരു കഥയെഴുതുകയും ചെയ്തു. അതാണ് ‘അവകാശി’.

ഇരുപത്തിരണ്ടാം തീയതി തന്നെ ഞാന്‍ സെറ്റില്‍ ചെന്നു. ഇന്നുമോര്‍ക്കുന്നു, അന്നു ഷൂട്ടുചെയ്ത ഒരു രംഗം, പ്രേംനസീറുമായിട്ടുള്ള ഒരു പ്രേമരംഗമായിരുന്നു. എന്നേയും നസീറിനേയും രണ്ടുമുറിയിലിട്ടു പൂട്ടിയിരിക്കുകയാണ്. എനിക്കാഹാരം തരും, പക്ഷേ മറ്റേ മുറിയില്‍ കിടക്കുന്ന നസീറിനില്ല. അവസാനം എന്‍റെ സാരിയില്‍ കെട്ടി ചോറു പാത്രം ജനാലയിലൂടെ ആട്ടി ആട്ടി നസീറിനു കൊടുക്കണം.

ചോറു കിട്ടി ഊണു കഴിയുമ്പോള്‍ ‘ഹീറോ’ യ്ക്കങ്ങു തന്‍റേടമായിക്കഴിയും. അപ്പോള്‍ ഞാന്‍ പറഞ്ഞു: ‘ഹോ! ചോറകത്തു ചെന്നാല്‍ എന്തൊരു തന്‍റേടം!’………….

പ്രേംനസീറിനെ ഞാന്‍ അതിനു മുന്‍പേ ആലപ്പുഴവെച്ച്കണ്ടിട്ടുണ്ടായിരുന്നു. അന്ന് നസീര്‍ മെലിഞ്ഞ ഒരു ചെറുപ്പക്കാരനായിരുന്നു. ആകര്‍ഷകമായ ശരീരസൗന്ദര്യമുള്ള ഒരു യുവാവ്! പക്ഷേ ഇപ്പോള്‍ നസീര്‍ എന്തു മാറിയിരിക്കുന്നു. താന്‍ നന്നാവുന്നതുപോലെ മറ്റുള്ളവരും നന്നാകണമെന്ന് നസീറിന് ആഗ്രഹമുണ്ട്.

‘അവകാശി’ സാമ്പത്തികമായി ഒരു ‘ഗംഭീരന്‍’ വിജയമായിരുന്നു. നൂറു ദിവസങ്ങള്‍ വരെ ആ ചിത്രം പ്രദര്‍ശിപ്പിക്കപ്പെട്ടു. ആരും വിചാരിച്ചിരുന്നില്ല ആ ചിത്രം ഇത്രയധികം വിജയിക്കുമെന്ന്. അതിനു സ്റ്റാന്‍ഡാര്‍ഡില്ലാ; സമ്മതിച്ചു….

പക്ഷേ ‘രണ്ടിടങ്ങഴി’യേക്കാളും ‘മറിയക്കുട്ടി’യെക്കാളുമൊക്കെ സാമ്പത്തികമായി വിജയിച്ച ചിത്രമതായിരുന്നു. ചിത്രങ്ങള്‍ക്ക് സ്റ്റാന്‍ഡാര്‍ഡില്ല എന്നു കുറ്റപ്പെടുത്തുന്നതെന്തിനാണ്? നിര്‍മ്മാതാക്കള്‍ക്ക് പണവും ആവശ്യമല്ലേ? നല്ലചിത്രങ്ങള്‍ക്കു സ്വീകരണം കുറഞ്ഞു പോകുന്നതിന്‍റെ കാരണക്കാര്‍ കാണികളായ പൊതുജനങ്ങള്‍ തന്നെയല്ലേ?

‘അവകാശി’യുടെ വിജയത്തിന് ഏറിയകൂറും കാരണം എസ്.പി.യും മുതുകുളവുമായിരുന്നു. അവരുടെ ഹാസ്യരംഗങ്ങള്‍ക്കാണ് കാണികള്‍ പ്രാധാന്യം നല്‍കിയിരുന്നതും.
മെരിലാന്‍ഡ് ചിത്രങ്ങളിലൊക്കെ കുടുംബരംഗങ്ങള്‍ക്കും ഹാസ്യ രംഗങ്ങള്‍ക്കുമാണ്പ്രാധാന്യം നല്കാറ്!

പ്രേമരംഗങ്ങള്‍ തീരെ അപ്രധാനങ്ങളാണുതാനും. ‘അവകാശി’യുടെ വമ്പിച്ച വിജയം മുതലാളിയെ കൂടുതല്‍ ഉത്സാഹിയാക്കി. എല്ലാവരുടേയും ഒത്തൊരുമിച്ചുള്ള സഹകരണമാണ് ‘അവകാശി’യുടെ വിജയമെന്ന് അദ്ദേഹം മനസ്സിലാക്കി. അതുകൊണ്ട് ആരേയും പറഞ്ഞുവിടില്ല എന്നൊരു മനോഭാവം അദ്ദേഹത്തിനുണ്ടായി. ‘അവകാശി’യുടെ പാട്ടുകളും നല്ല ട്യൂണുകളിലുള്ളവയായിരുന്നു. ഡാന്‍സില്ലായിരുന്നുതാനും.

ഷൂട്ടിംഗ് തീരെ അശ്രദ്ധാപൂര്‍വ്വവും. എങ്കിലും ചിത്രത്തിന്‍റെ അതിശയകരമായ വിജയം മുതലാളിക്ക് കൂടുതല്‍ ചിത്രങ്ങള്‍ നിര്‍മ്മിക്കണമെന്നുള്ള ആഗ്രഹമുണ്ടാക്കി. യാത്രപറഞ്ഞിറങ്ങിയ അഭനേതാക്കളോടൊക്കെ അദ്ദേഹം ഓര്‍മ്മപ്പെടുത്തി: “അടുത്ത പടത്തിനു വരണം”.